Saturday 23 October 2010

මිතුර ඇයිද ... ? මේ.. පෙරමඟ වසා ගෙන



අල්ලට සිඟා වත් රස නැති කැවිලි කකා
කොල්ලට උගන්වන මඟ වැලකුවයි යකා
මුල්ලට වනු නොදී මතු පරපුරක් මකා
ගොල්ලට එකතු නොමවව් ! ඉදිරි වැඩ තකා


සතර දැන ඉගෙන මං පෙත් හදාගෙන
එතෙර වන තැනෙදි අං පටලවා ගෙන
නිතර කී කතා යළි යළි දෙසාලන
මිතුර ඇයිද ... ? මේ.. පෙරමඟ වසා ගෙන


ඇවිත් පැන කඩුලු අභියෝග ජයගෙන 
පුවත් දැන.. නොදත් ලෙස වළං බිඳගෙන
දොහොත් දී පුදන ගුරු පියන් වටලන
තවත් මෙහෙයුමක් දෝ රටක් අවුලන


හඬ නම් තරුණ හඬ සරසවි ජයගත්තෝ
වැඩකට නොමැති අරමුණු වල වී ගැත‍තෝ
ඉඩ නොතබා විහින් මඟ අහුරා ගත්තෝ
අඩ පණ කරයි සරසවියම වී ඉත්තෝ


කඩ ඉම උසස් පෙළ ලකුණක දෙකක නොමින්
හැඬ වෙන දූ පුතුන් පිටතයි ඇතුලේ නොවින්
ඉඩ ලඳ පිනින් ඇතුලට ආ අසුරු සැනින්
මැඬ වෙන දූ පුතුන් එන මඟ අගුලු නොලන්


‍රැසක් පුතුන් දූවරුනගේ නෙත්  හදන
දොරක් ඇරෙන..හෙට ලොව ජය ගනු ලබන
දිනක් අත ලඟම බව දෙස් දෙන බැවින
එකක් නොව ‍රැසක සරසවි දොර ඇරෙන


යන්තරේ හොදයි නම් වැඩ නිරවුල්ය
මන්තරේ තමයි හැමදාමත් හෙනය
පිංකරේ නැතිදු ලබනට විදු එළිය
අන්තරේ ගෙනෙයි හැමොටම රතු එළිය.

6 comments:

෴ හසියා ෴ said...

මේක හැම කැම්පස් එකකම ඇතුළු වෙනතැන සහ තවත් තැන්වල ලොකුවට ලියලා ගහල එල්ලන්න කියලා මම නියෝග කරනවා.....

Amila Chathuranga said...

මින්පෙර මැරුනෙ නැති විරුවෝ අද කොහිද????
උන්ගිය සමාජය උන් තනලා ඇතිද??
ගොන්පොර වගේ හැමදා ගුටි කෙලි නැතිව..
මල්ලියෙ උඹත් හිතපන් අපි ව දිනවන්නට..

විහඟ ගීතය said...

@෴ හසියා ෴

සාස්තරේ උගනින මඟ වසාගෙන
මෝස්තරේ කට පිකටිං බදාගෙන
ගෝස්තරේ වී නඩයට මුසාලන
නේත්තරේ කවදා පහදවා දෙන

විහඟ ගීතය said...

@ indi

සරසවි බොහෝ ඇත ලොව එකම යායකි
සුරුවිරු ලෙසින් යයි දුර පිහිනා යාහැකි
දිනුමට බොහෝ දේ ඇත හොදින් දිනියැකි
බලනුව දැස් ඇර මඟ හොදින් මගේ සකී

sahan ළියනගෙරත්ගමයා said...

සරසවි සිසුන් පාරට බැස වෙර දෙන්නේ
පුද්ගලීකරනය නිදහස වලලන්නේ
ජෙප්පන් පිට දමා සරසවි ගිනි පිට දෙන්නේ
ඇස්.බී තුමා තණකොල විතරද කන්නේ

විහඟ ගීතය said...

@ ර ත් ග ම යා

ලකුණක දෙකක එහෙ මෙහෙ වීමෙන් නතර
වියයුතු නම් නොවේ මගේ දරුවන් ගෙදර
ජය ගත යුතු ලොවකි,මඟ පහදා එතෙර
වන්නට පවුරු පාලම් හදමුද මිතුර