Friday 31 December 2010

අළුත් අවුරුදු කවිය



සියල් සිරින් පිරි සුභ අවුරුදු හීන
කැළැල් සිත් සැදී මිතු දම් ගොඩ දාන
සියල්ලන්ට සිතු පැතු සම්පත් ගේන
මඟුල් ලකුණ කිය, කවි සිතිවිළි පාන

කඩින් කඩ එකතුවී මහ ගඟක් වෙලා
බලන් සිටිද්දිම මහ පෙළහරක් කලා
නෙතින් නොදු‍ටු බ්ලොග් සඟයිනි මෙතෙක් වෙලා
හිතින් බැඳුන යුරු අරුමය පසක් කලා

කියන්නට තිබූ බොහෝ දේවල්  නොකිපි
ලියන්නට ලැබුන ඉඩකඩ ගැන වැලපී
නො එන්නට ගමන් යන තුරු  වැද සැතපී
පිපෙන්නට හරිමු මල්,  මල් ලොව නොපිපී

හි‍ටු කියා නවත්තාගනු බැරි බැවිනී
ඉ‍ටු වුනා නොවුනා, දින ගෙවිලා ගොසිනී
පි‍ටු පපා ගියත්, නව වසරට ලොබිනී
ත‍ටු  විදා පියාඹන්නට පින ලැබුනී......


Thursday 30 December 2010

යෙහෙන් කොහේ හිටියත් මට සතුටකිය





මල් උයන් මැදින් අත බැඳ ගිය තාලේ
විල් තෙරේ පිපුන මල් දැක බැඳි ආලේ
වල් වැදී මතක පොත අකුලන ලීලේ
කල් බලන් හිටිය හොදටම ඇති රාලේ


පින්නේ පිපුන බිම් මල වාසනාවන්
උන්නේ කොහිද මෙතුවක් වී මුලාවන්
දන්නේ නැති නමුත් සිතිවිළි මනාවන්
එන්නේ ඇයිද මේ ලෙස වැහි වළාවන්


රං මලේ වරුණ රන් මල නොදැක ගයා
ලං වෙලා හිතට,  හිත ගිය කරුණ සොයා
තුං යමේ සිහිනයේ  නිදි නැතිව පියා 
මං මෙහේ අවදියෙනි නුඹෙ නැතිව දයා


දුකින් දුක නසා පේවෙන සැපතකිය
හිතින්  නෙතින්  වැලපීමද අපුලකිය
කොහෙන් කෙලවරද, ඒ  මඟ නොවැලකිය
යෙහෙන් කොහේ හිටියත් මට සතුටකිය




Tuesday 28 December 2010

කල් බලන් ඉඳලම ඇතිවෙලා





නෙතු පියාගෙන හිත ගොළු වෙලා
නුඹ  හිතෙ පතුලෙම සඟවලා
සිතුවිළි කලලේ කල් සපිරිලා
කල් බලන් ඉඳලම ඇතිවෙලා


මුව සිප බදා  තුරුලට වෙලා
නුඹ කියු කතා නැත ගොළුවෙලා
මුළු ‍රැයම නෙතු පියවෙනු නොලා
ඒ සිහිනයම සිතුවම් කලා

නුපුරුදු නුහුරු සුවඳක ගලා
ආ මිහිරි මතකය පුරවලා
හිරු නැගෙන සඳ, හඳ බැස පලා
යන ලෙසින් කොහෙදෝ සැඟවිලා

රණ මොනර  නැ‍ටුමක පැටළිලා
යන ගමන ගැන අමතක වෙලා
නුඹේ මඟත් මම අවහිර කලා
ඒ  නිමිත්තම තවමත් බලා

කොයි කවුරු වෙද මෙය හිස සලා
අනුමත කරන්නට සැරසිලා
නුඹ වගෙ හිතට කීකරුවෙලා
ඇයි ?යන්න බැරි  මට නැවතිලා

දින දවස් ගෙවෙමින් පසුවෙලා
අපි අළුත් වී වියපත් වෙලා
නුඹ අතැර යන මතකය හලා
යනු නොහැක, ඇත මා සිත වෙලා

වස් දොස්  සියළු දුක් අකුලලා
නුඹ අළුත් ඇසකින් ලොව බලා
යන ගමන  ඈතින් ඉඳ බලා
සිත හදා ගමි ඈතට වෙලා

Friday 24 December 2010

අළුත් ජනකවි 8



අළුත් ජනකවි  7  මෙතනින්  කියවන්න

පියයි මගේ උරුමය,  එලෙසම ‍රැක්කා
ගියයි ඔහුත් පුරවැසි පෙරමුණ එක්කා
ළමයිනේ වෙමින් නුඹලට දැනමුත්තා
මමයි රටට නොව සිරිකොතටම ලොක්කා


හම්බන්තොටට සව්සිරි ඉතිරෙමින් පිරි
නැව් තො‍ටුපොළ ගුවන් තො‍ටුපොළ ගිමන් හරි
මංමාවත් හැදෙයි පාලම් වෙමින් සරි
සංවර්ධනය වෙයි කවුරුත්  කොහොම හරි


වී මිල අඩුවෙලා ගොවියෝ වහ බොනවා
හාලේ මිල දැකල වැසියෝ දෙස් දෙනවා
සිල්ලර සටන් පාටය සටනට එනවා
මහරජ! කැකිල්ලේත් කැසපොට  අමුනනවා


කියත් බොහෝ දේ ඡන්දෙට පද බැදලා
වියත් හූ නොවෙති අපි හරකට ඇඳලා
තබත් නුඹ ගැනම හිත අහිතක් නොබලා
නමුත් අයවැයෙන් නුඹෙ පතටම බෙදලා


නොදනිම් ඉලක්කම් හරබය නුහුරු බැවින්
හිදිනෙම් මඟ බලාගෙන බත ඉදෙන සැනෙන්
වියදම් පිරිමහා ගන්නට නොහැකි කමින්
බලනෙම් ආශ්චර්ය්‍ය, මෙහි ‍රැගෙන වරෙන්

Sunday 5 December 2010

මංපෙත් හදාගමු......




සීතළ සඳට මුඳු සේළය පිරුවාය
රෑ තරු දෙනෙත් එය දැක ඉඟිමැරුවාය
ඊතළ දුනු දැරූ මල්සර දුනුවාය
මේ වර නම් ඉතිං වරදක් නොකලාය


පීදුනු පැතුම් බොල් සුළඟට යන්න නොදී
ඈඳුනු හිතට අවුලක් අත්වන්න නොදී
දේදුනු සිහිනයේ ‍රැදිලා නොදී
පෑහුනු නුඹේ, හිත ළඟ උණුසුමේහි ‍රැදී



සාර සියක් මල් සුවදට මුසු වූව
නෑර එමල් සුවඳට ගත සිත පෑව
කාරණාව දැන හැදිනූයෙන් මාව
පූරමින් පෙරුම් සෙනෙහසකට යාව


තල් පත් පුරාවට පෙම් ගී නොලියාම
කල්ගත් නමුත් සෙනෙහස තරුණයි තාම
බැල්මෙත් සිනාවෙත් අඩුවක් නොතියාම
මංපෙත් හදාගමු සතුටින් හැමදාම....