Wednesday, 24 August 2011

හීනියට පෑ සිහිනෙකි



හීනියට පෑ සිහිනෙකි
පහන් තරුවට අරුතකී
හිරුගෙ අභියස කදෝ පැණි සකි
ගිලිහෙනා යුරු අරුමෙකී

රෑ දවල් නිති රකිමිනී
පෑ සෙනේ නොපිරුන මෙනී
ගෑ සුවඳ සිහිනෙට විනී
ඈ කොහිද..? මම තනියෙනී

නෙතින් නෙත ඈඳුන නියා
සිතින් සිත දෝරේ නොයා
මතින් මත පීදුන දයා
ඉතින් හිත කොහේදෝ ගියා

දුකින් ළතැවිල්ලෙන් පිරී
නෙතින් කඳුළක් වී පෙරී
හිතා ගන්නටවත් බැරී
කුණා‍ටුව හද දොර හරී

පියාඹන විහඟුන් ‍රැහේ
යළිඳු එයි ‍රැඳුනත් කොහේ
සිතින් පිටමං වුන දොහේ
එයිද කවදාවත්  මෙහේ

බැඳුනු උඩුසිත් හැරපියා
රිදුනු යටිසිත් හැඬවියා
සිතුනු තැන්වල හිත තියා
අඬනු ඇයි! දුක කිය කියා


16 comments:

ගල්මල්-Coral said...

හිරුත් පරුසව දවද්දි
බිම්කඩ පාලු විය
විහඟුන් ඈතට ගියාද
සොයනා පරවිත් නොවිය

සිහිනෙන් වත් සඳුන්
ගෑවෙත් නම් සිසිලකි
සිහිනෙන් වත් පෙලක්
කවිය දැක සතුටකි

මාතලන් said...

හැමදාම වගේ ලස්සනයි මේකත්

Chandi said...

හැමදාම මෙහෙම දුක කියා කවි ලියා
ඉන්න නමි අනේ මෙි විහග ගී කියා
සනසන්න ලංවෙලා මිහිරි ගී ගය ගයා
පතන්නමි ඉක්මනින් හමුවන්න ඒ පි‍්‍රයා

විහඟ ගීතය said...

@ ගල්මල්-Coral

ගතත් සිතත්
හුදකලාවෙ
තනිය විදී නම්

නෙතක් කඳුළු
පුරවාගෙන
දුකට හඬා නම්

කෙනක් පෙනෙන
මායිම දුර
වහන් කලා නම්

කවක් විහඟ
ගීයක් වී, අරුත
සොයා දෙම්,

විහඟ ගීතය said...

@ මාතලන්

ලියා නේක පදරුත් විමසමින් ඉඳ
කියා ගන්න පෙර තවලිපි වැලක් ඇද
පියා ගෙන දැස් ඔබ සිහි කරණ සඳ
ඔවා දීම නම් මට සතුටකිය සොඳ

විහඟ ගීතය said...

@ Chandi

දුක විඳිනට පුරුදු වූ කල සැනසිල්ලේ
එක දෙක නොවේ බළ ඇණියක් වුව සෙල්ලේ
මොකටද බොරු කතා කියනෙමි එක එල්ලේ
දුක නැති තැනක විඳිනට සතුටත් "ඉල්ලේ"

SRI MANJULA said...

නොපිරූ සෙනෙහසින් ලද දුක් කඳුළු ග‍‍‍ඟේ
කාලය ගෙවුන යුරු යලි මා සිතට නැගේ
මුළු ලොව එපා වී හද සෝ සුසුම් නැගේ
විරහව දුකයි!!!! ඇත්තට සංසාරෙ වගේ

හදවත තවන දුක!!! විරහා ගිනි දල්ලේ
එකලදි දැනුනි! අද හිටියත් සැනසිල්ලේ
ඔබෙ කවි බොහෝ කියවූයෙමි එක එල්ලේ
විටකදි සිතේ..... අපි පොල් මෙනි එක වල්ලේ

Anonymous said...

Wihga gitaya dan goluwala
aya noyannma nihada wala...........

Anonymous said...

Aya me hamadayakma matakayan witara.

තිස්ස දොඩන්ගොඩ said...

මරණින් මතු යහපත් බවයක්ම ලැබේවා හිතවත් සොයුර...

priyantha said...

මගේ කවි වලට ගුරු වරයෙක් වූ ඔබට නිවන් සුව පතමි.

අභීත said...

නිවන් සුව පතමි.. මම දැනුයි දැන ගත්තේ..... හිතා ගන්න බෑ....

නිශ් said...
This comment has been removed by the author.
නිශ් said...

නිවන් සුව පතමි..

කතන්දර Kathandara said...

බ්ලොග් අවකාශයේ මා දුටු හොඳම සිංහල එලිසම කවියා ඔබයි!

නිවන් සුව පතමි.

දුකා said...

උපදින මතු අත්බවයක නිවන් සුව ලබා ගත හැකිවේවා ඔබට . ..