වයසට නොහොබිනා බහු කෝළම් රැගෙන
කැටිකොට නිවසටම ගොස් ඇඳ දා තිබෙන
නහුතෙට දියුණුවී ඉහමොල කිති කැවෙන
නියරට පිටින් කක්කු‍ටු වලවල් මකන
ප්‍රේමාතුර සොඳුරු ඇස් නොදකින සේම
කාමාතුර රකුසෝ මං වළකති තාම
සීමා වැට කඩොළු දැන ගන්නද කෝම
සාමා අමරටත් මඟ වැරදුනි බෝම
ගමින් ගම තිබුන අම්බලමට නිතින
ගිමන් හරින තානයම් හතු පිපෙන
ගමන් කරන්නේ හොද අතකට නොවන
වරෙන් ගෙදර නොහැරම මඟ තොට ගිමන
ලැඟ මඟ තොට ලාභ තානායම් අතර
ඇඟ මසටම බැඳුන පෙම් වතුනේ නිතර
ඉඟ සුඟ මිසක හුදු සෙනෙහසකට පතර
මඟ පෙන්වන කෙනක් වෙත් දැයි කිව මිතුර
කොල්ලන් උපත් පාලන අඩු වැඩිය ගෙන
කෙල්ලන් ජාමේ බේරාගෙන කඩුලු පැන
සල්ලන් වුවත් කිම දොස්තර අතට ගෙන
පල්ලන් බහින්නේ අද නොව දිනේ එන
කල්පැන ගියපු කව් සිරිමත් බණ දැහැන
ඇල්මෙන් අකුරු ඇයි? සැතපෙන සිරියහන
විල්ලුද මත රැදෙන පින පමණිය නිවන
කල් යල් බලමු එනකොට විදිහට පැමින
නොපනත් නිසා වුන අවැඩට කඳුළු බොන
වියපත් නොවූ මල් හඬනා අයුරු දැන
නැවතත් නොවන්නට ඒ මං අහුරවන
ගුණවත් වටපිටාවක් ගොඩ නගනු මැන!
15 comments:
වයසත් සමග එන කනමද කුලප්පුව
අයෙකුට විනෝදයි අයෙකුට කඳුළු දෙන
ඉගෙනීමත් සමග ආලය පටල ගෙන
තේරෙන විටදි අශුවය ගොස් ගොඩක් දුර
තේරෙන විටදි අශ්වය ගොස් ගොඩක් දුර
@වත්
වැඩිහිටියන් මුලින් දැනමුතු වියයුතුය
ඉඩ කඩ අගාදෙට මඟ වැළකිය යුතුය
උඩගෙඩි දෙන එවුන් නම් ගස් බැඳ යුතුය
වැඩකට ඇති හෙටක උරුමය අප සතුය
අප්පච්චියේ බරපතල කතාවක්...ඕකට ප්‍රධානම හේතුව අපෙ රටේ කෙරෙන ලිංගිකත්වය හැංගීමේ පුරුද්දයි...ඉතින් අපේ එවුන්ට ලිංගිකත්වය ගැන තියෙන එකම අධ්‍යාපනය තම කාම ච්ත්‍රපටි...වැරැද්ද කාගෙද? කොතැනද?...අපේම් කුහක චින්තනයේ නේද?...අනික කෙල්ලො දාහක් එක්ක බුදියා ගත්තත් නාල ගෙට ආවාම පිරිසිඳුයි පිරිමියා ලෝකෙටම....ඔක්කොමල්ල ඇඟිල්ල දික්කරන්න බලාන ඉන්නෙ ගැහැනියට.....ඒත් අපි කියන්නේ අපේ සමාජය බට හිරට වඩා ඉතාම ඉහලයි කියල...අනේ මන්දා...කවදානම් මිදෙන්නට ද මේ හණ මිටි මනසිකත්ව වලින්.....
දෙමාපියන් හා දූ දරුවන් හා පෙමිනා
බැඳි සිටිය පෙර කල ගරු බැතිනා
බිඳී ගිහින් ඒ පෙම කිසිවෙකු නොදැනා
කෙසේ හැසිරේද මේ දරුවන් සොඳිනා
දවසින් දවස සිත මුදලට බර වෙනවා
දෙගුරුන් දුවා දරුවන් ගෙන් දුර වෙනවා
දරුවන් අඳුරු මාවත අද තනි වෙනවා
දවසින් දවස මේරට බල්ලට යනවා
@Shadow/හේමලයා
කැටි කොට කවියකින් කියලා දමනු බැරි
අපිහට උරුම දේ බටහිර දකිනු බැරී
ගුරුකොට ගෙනා හොද යහගුණ කොහොම හරි
මතු පරපුරට සු‍රැකිය යුතු කවද හරී
@priyantha.ප්‍රියන්ත ඒබී
භෞතික පැති හඹා ඒ මත්තෙම නැහෙන
ලෞකික සබඳ කම් ගැන මායිම් නොවෙන
පව් දැක දැකත් පව් කරනට භය නොවන
සව් සිරි අපායකදෝ අපි දිවිගෙවන
හිත් වල සැබෑ සෙනහස පීඳුනු පසුව
අත් ඇල්ලිය හැකිය තු‍ටුසිත් ලෙන්ගතුව
නැත්නම් මේ ගමන කෙළවරකුත් නැතිව
නැත්තට නැතිවේවී හිස් මිනිසුනන් ඇතිව
නාඹර වයසෙ ඔය පිස්සුව ඇති වෙනවා
කුඩා කලදි මේව අපිට හන්ගනවා
හැගුමට වහල් වී ගොන් කමෙ රජ වෙනවා
තේරෙන කලදි බොහො දුර ගොස් දුක් වෙනවා
@ Hasitha ජයසූරිය
යම් යම් වයස් වල ඉගෙනිය යුතු කරුණු
ඉම් බල බලා අත් විඳ ගත යුතු පුතනූ
නිම් තෙර දකින කල සිප් සයුරෙහි පිරුණු
දම්වැල ඉවත දා ඇයි මේ ලෙස ගිලෙනූ
නියමයි කවි ටික නියමට ගලපල තියෙනව.
හේමලය කියන කතාවටත් එකඟ වෙමි.
නොපනත් නිසා වුන අවැඩට කඳුළු බොන
වියපත් නොවූ මල් හඬනා අයුරු දැන
නැවතත් නොවන්නට ඒ මං අහුරවන
ගුණවත් වටපිටාවක් ගොඩ නගනු මැන!
@Outsider
කාටත් තමගේ මත වල සිටි හැකිය
ඊටත් එහා ඒවට ගරු කළයුතුය
මාඅත් දකින්නේ රටකට යන කලය
කීවත් නැතත් නපුරට වැඩ වී හරිය
@ Amiththa's Blog
ඇවිත් සොයාගෙන දොර හැර ගෙන යතුර
කවිත් අසා රස වින්ඳේ නම් මිතුර
අයෙත් ඇවිත් යන එන විලසට නතර
අමිත්තත් අමුත්තෙක් නොව අප අතර
වෙනදා වගේම ලස්සනට ලියලා තියනවා. මාතෘකාව නම් අළුතින් සිතිය යුතු දෙයක්. හැම දෙයක්ම තියෙන්නේ ආවරනයකින් වහලා විතරයි.
මැණික්(සුළඟ)
@ මැණික්(සුළඟ)
දකිනා දේ දිහා ඇස් නොහැරා බලන
සිටිනා බොහෝ අය වැද මැදිහත් සිතින
නොමනා බවක් පෙන්වන්නේ නැති බැවින
කියනා කවි, විකල් සිතකට හැර කුමන
Post a Comment